Mae Tir Canol yn gweithio mewn partneriaeth â Choed Cadw, sy’n rheoli coetir Allt Boeth ym mhen uchaf Cwm Rheidol, er mwyn cefnogi’r camau cyntaf wrth ddatblygu cynllun argyfwng Cymuned Cwm Rheidol. Mae’r syniad o gael cynllun wedi dod gan y gymuned, sydd wedi gweld nifer o danau gwyllt yn ystod yr wyth mlynedd diwethaf, ac mae’r gymuned eisoes wedi cysylltu â Brigâd Dân Canolbarth a Gorllewin Cymru i gael cymorth i atal tanau. Er bod yr angen am gynllun wedi’i sbarduno gan y tanau gwyllt, gobeithio y bydd y broses o ddatblygu cynllun yn fuddiol er mwyn darparu gwybodaeth i gymunedau eraill yn yr ardal, ac yng Nghymru.
I ddechrau’r gwaith cynllunio, byddwn yn gweithio gyda Rupert Allan drwy gydol mis Mai er mwyn datblygu’r gwaith cychwynnol o fapio asedau cymunedol Cwm Rheidol, ardaloedd lle mae perygl o dân, lleoliadau trigolion, pwyntiau dŵr, trydan ac ati, ac unrhyw beth arall y gallai fod yn ddefnyddiol ei gynnwys mewn cynllun argyfwng. Dilynir hyn wedyn gan gyfres o gyfarfodydd/gweithdai gyda’r gymuned a rhanddeiliaid er mwyn llunio cynllun.
Diolch i Goed Cadw am gefnogi’r sesiynau gyda Rupert Allan.