Mae Tir Canol a Coed Cadw yn cynnig cyfnod preswyl i artist, ar y thema coed a/neu goetiroedd. Dyma gyfle i artist ddatblygu a/neu gyflawni gwaith sy’n ceisio (ail)gysylltu cymunedau â’r tirweddau yn ein hardal ni o Ganolbarth Cymru. Rydym yn chwilio am artistiaid newydd a sefydledig sydd â chysylltiad â’r ardal benodol hon y mae eu gwaith yn ymwneud â choed a choetiroedd. Mae’r cyfnod preswyl yn agored i artistiaid o unrhyw ddisgyblaeth sy’n gweithio mewn ffordd sy’n ymgysylltu’n gymdeithasol. Dim ond un cyfle sydd ar gael ar gyfer y cyfle penodol hwn.
Ardal Gyflawni’r Cyfnod Preswyl Coetir
Mae’r cyfnod preswyl hwn yn digwydd yn yr ardaloedd cyfun fel y nodir uchod – gweler y map isod. Mae’r cymunedau’n cynnwys Machynlleth, Tal-y-bont, y Borth, Aberystwyth, Llanidloes a Chwm Rheidol ond gall gynnwys mwy na hyn.
Beth rydym ni’n ei gynnig
Bydd disgwyl i’r artistiaid a gaiff eu dewis dreulio cyfanswm o fis yn gweithio yn yr ardal ddynodedig rhwng mis Rhagfyr 2026 a mis Mawrth 2027. Gellir gwneud hyn mewn un bloc, neu ei ledaenu drwy gydol y cyfnod.
Byddwch yn cael eich mentora gan yr artist lleol a rheolwr rhaglen Tir Canol, Alice Briggs.
Bydd ffi artistiaid o £3000, a fydd yn cael ei dalu mewn 3 rhandaliad, 40% fel taliad cychwynnol, 40% hanner ffordd drwodd, ac 20% ar ôl cwblhau’r cyfnod preswyl.
Byddwch yn cael cymorth i ddarparu gweithgareddau a digwyddiadau ymgysylltu gan swyddog ymgysylltu Tir Canol Rosie Slay a swyddog ymgysylltu a chyfathrebu Coed Cadw, Kirsten Manley. Mae gennym hefyd rwydwaith helaeth o arbenigedd drwy ein partneriaid a’n tîm, y gellir manteisio arno.
Mae cyllid ychwanegol ar gael a fydd yn cefnogi’r gwaith o ddarparu digwyddiadau a deunyddiau cyfathrebu.
Mae awydd i drefnu arddangosfa/arddangosfeydd cyhoeddus yn 2027-2029, gyda’r gwaith yn cael ei ddatblygu drwy’r cyfnodau preswyl hyn. Rydym yn disgwyl i’n hartistiaid weithio gyda ni i ddod â’u gwaith i fformat y gellir ei arddangos, am ffi ychwanegol os bydd hyn yn digwydd.
Beth rydym ni’n gofyn amdano
Prif nod y cyfnod preswyl yw ceisio ailgysylltu cymunedau â choed a choetiroedd. Rydym yn disgwyl gweld rhywfaint o ymgysylltu amlwg â’r gymuned. Gallai hyn ddigwydd drwy sgyrsiau, gweithdai, digwyddiadau, neu unrhyw ddull arall.
Pwy ydych chi?
Mae’r cyfle’n agored i artistiaid o unrhyw ddisgyblaeth, e.e. celf weledol, celf perfformio neu gelf gymunedol. Mae hefyd yn agored i unrhyw gam mewn gyrfa. Nid yw sgiliau Cymraeg yn ofynnol, ond byddant yn fanteisiol i’ch galluogi i weithio gyda chymunedau Cymraeg eu hiaith.
Rhaid i’r cyfnod preswyl ymwneud â choed a choetiroedd mewn rhyw ffordd. Rhaid i artistiaid ddeall a pharchu bywyd gwyllt, ecoleg a threftadaeth yr ardal. Mae arnom eisiau gweld sut bydd y cyfle hwn yn datblygu eich ymarfer.
Yn eich ffurflenni cais, byddwn yn chwilio am dystiolaeth o’r canlynol:
Cysylltiad â lle
Mae angen i artistiaid fod â chysylltiad amlwg â thirwedd Tir Canol. Gall hyn fod oherwydd eu bod yn byw yma, oherwydd bod ganddynt gysylltiad teuluol â’r ardal, neu fod eu gwaith neu eu hymarfer wedi’i wreiddio’n gryf yn y dirwedd hon.
Ymgysylltu’n gymdeithasol
Rydym yn chwilio am artistiaid sydd ag ymarfer sy’n ymgysylltu’n gymdeithasol.
Gwaith sy’n ymwneud â choed a choetiroedd
Rydym yn chwilio am gysylltiad â choed a choetiroedd. Gallai’r cysylltiad hwnnw fod yn llythrennol, yn drosiadol, yn faterol neu fel arall, ond dylech egluro’r cysylltiad yn glir yn eich ffurflen gais.
Sut mae ymgeisio
Gallwch ddod o hyd i’r brîf llawn yma
I ymgeisio, cyflwynwch ffurflen gais, gyda CV neu bortffolio a hyd at 5 delwedd, fideo, recordiad, i’w rhannu drwy ffeiliau ZIP, ffolderi a rennir yn Google Drive, Dropbox neu Wetransfer, erbyn 9am 26 Hydref 2026.
Os oes gennych chi unrhyw gwestiynau am y cyfle hwn ac a yw’n addas i chi, cysylltwch â Rosie Slay, swyddog ymgysylltu, ar rosie@tircanol.cymru