Ddydd Gwener 27 Chwefror, fe wnaethom lansio Newid Llanw, llawlyfr ar addasiadau arfordirol sydd wedi cael ei lunio ar y cyd â chymunedau Dyfi. Nod y llawlyfr yw darparu’r adnoddau a’r wybodaeth sydd eu hangen ar drigolion lleol, rhanddeiliaid a’r rhai sy’n gwneud penderfyniadau er mwyn addasu i dirwedd arfordirol sy’n esblygu. Mae ar gael ar-lein a bydd nifer cyfyngedig o gopïau caled.
Mae’r llawlyfr yn rhoi gwybodaeth am ffyrdd y gallwn ddiogelu cynefinoedd bregus, storio carbon, cefnogi iechyd a llesiant, a helpu i ddiogelu seilwaith lleol. Mae hefyd yn darparu dolenni i flaenoriaethau cenedlaethol ar gyfer llythrennedd cefnforol, buddsoddiad glas, a meithrin gallu cymunedau i arwain newid ystyrlon. Datblygwyd y deunydd drwy gyfres o weithdai cyd-ddylunio rhwng 2024 a 2025, ac mae’n cyfuno gwybodaeth a phrofiad lleol gyda dulliau gwyddonol.
Lansiwyd y llawlyfr mewn digwyddiad yng Nghanolfan y Celfyddydau Aberystwyth, lle cafwyd trafodaeth banel ar y pwnc ‘Tir, Iaith a Pherthyn’ gyda’r awdur Elinor Gwynn, swyddog natur Tir Canol, Ben Porter a Jill Bullen Hulse, cynghorwr arbenigol ar Dirwedd a Threftadaeth ar gyfer Cyfoeth Naturiol Cymru.
Prosiect Tir Canol yw Newid Llanw, sy’n cael ei arwain gan RSPB Cymru a’i ariannu gan y Gronfa Rhwydweithiau Natur – rhaglen sy’n cael ei darparu gan y Gronfa Dreftadaeth, ar ran Llywodraeth Cymru gyda’r nod o gryfhau gwydnwch safleoedd morol a thir gwarchodedig Cymru, a chyflymu adferiad natur.