Mae Ben Porter, Swyddog Natur Tir Canol, yn gweithio gyda pherchnogion tir a ffermwyr, gan gynnig arolygon bioamrywiaeth o’u tir, ac unrhyw goetir arno, i sefydlu eu gwerth a’u cyflwr ecolegol. Wedi hynny, byddwn yn cynnig cyllid ymyrraeth i’r safleoedd hynny lle mae Ben a’r ffermwr wedi cytuno ar gamau gweithredu ar gyfer gwella.
Hyd yma, mae ei arolygon o’r ffridd (y parth trawsnewid rhwng yr iseldiroedd caeedig ac ucheldiroedd agored ffermydd) wedi datgelu sawl rhywogaeth restredig goch gan gynnwys Llinosiaid Linaria cannabina, Crec yr Eithin Saxicola rubetra, Corhedydd y Coed Anthus trivialis, Telor yr Helyg Phylloscopus trochilus, a’r Bras Melyn Emberiza citrinella.
Mae’r rhywogaethau hyn yn ffynnu lle ceir cyfuniad o goed gwasgaredig a phrysgwydd, felly mae’n bwysig bod dulliau fel ‘plannu coed heb ffensys’ (plannu coed ifanc tal unigol mewn ardaloedd o fieri neu eithin isel gyda digonedd o le rhyngddynt) yn cael eu defnyddio i sicrhau bod y cynefin hwn yng Nghymru yn parhau i fod yn hafan i’r rhywogaethau hyn sydd mewn perygl.
Mae Ben yn gallu cyfeirio at fathau eraill o amaeth-goedwigaeth gan ddefnyddio adnoddau y gellir eu lawrlwytho ar gyfer pherchnogion tir a ffermwyr ar dudalen we Coed Cadw Cefnogaeth i Ffermwyr a Pherchnogion Tir yng Nghymru. Mae’r canllawiau hyn yn cynnwys rheoli gwrychoedd, coed mewn caeau, plannu torlannol, lleiniau cysgod, a systemau coed-ac-aredig.
Mae amser a chefnogaeth Ben, ynghyd â’r adnoddau hyn y gellir eu lawrlwytho, yn bosibl oherwydd Coed Cadw, gyda chefnogaeth gan chwaraewyr Loteri Cod Post y Bobl.
Cysylltwch â ni os ydych chi am wybod sut gall Ben gefnogi eich tir.
