Mae’n bleser gan Tir Canol gyhoeddi ein bod wedi bod yn llwyddiannus gyda chais cyllid o’r sefydliad Esmeé Fairbairn i weithio ar brosiectau tir, môr a diwylliannol cymunedol cyd-ddylunio am y bedair blynedd nesaf. Mae’r prosiectau hyn yn cwmpasu pedair prif elfen:
1) Cyd-ddylunio cynllun gweithredu rheoli llifogydd naturiol ar gyfer dalgylch Leri, mewn partneriaeth â Grŵp Llifogydd Cymunedol Talybont ac eraill. Mae’r grŵp llifogydd lleol hwn eisoes wedi bod yn gweithio ar Brosiect Gwydnwch Llifogydd am y ddwy flynedd ddiwethaf yn nalgylch Leri, gan gynnwys plannu dros 20,000 o goed gyda thirfeddianwyr lleol. Bydd Tir Canol yn gweithio’n agos gyda’r grŵp i uwchraddio’r gwaith hwn, gan gynnal prosiect cyd-ddylunio blwyddyn i ddatblygu cynllun hirdymor a dechrau cyflawni elfennau allweddol o hyn yn y blynyddoedd dilynol.
2) Parhau i ddatblygu’r prosiect peilot Treialon Graddfa Maes ar ôl ei lwyddiant cychwynnol, gan weithio’n agos gyda ffermwyr a thyfwyr lleol i’w cefnogi i dreialu cnydau neu gynhyrchion newydd mewn ffordd amaeth-ecolegol
3) Gwreiddio’r celfyddydau fel arf ymgysylltu a chydweithio allweddol ar draws ardal prosiect Tir Canol. Mae’r celfyddydau yn chwarae rhan allweddol yn ein huchelgais i gysylltu pobl yn ddyfnach â’u tirwedd leol, â’r byd naturiol ac â’n treftadaeth ddiwylliannol. Trwy gyfres o weithgareddau, bydd yr elfen hon o’r prosiect yn meithrin datblygiad nifer o fentrau artistig cyffrous yn ymwneud ag artistiaid lleol, crefftau traddodiadol, rhaglenni cyfnewid a sioeau yn yr Eisteddfodau
4) Treialon adfer cynefinoedd tirfeddianwyr a ffermwyr. Agwedd allweddol a godwyd gan dirfeddianwyr yn ystod cyfnod Cydgynllunio Tir Canol oedd cael mwy o gefnogaeth i ddeall ffyrdd o reoli eu tir mewn ffordd fwy ystyriol o natur. Bydd yr elfen hon o’r prosiect yn darparu cyllid i dreialu amrywiaeth o wahanol ddulliau sy’n meithrin mwy o fioamrywiaeth ochr yn ochr â systemau ffermio’n lleol, gyda’r bwriad o ddeall sut y gellir uwchraddio ac ariannu dulliau o’r fath yn y tymor hwy.
Gyda’i gilydd, bydd y bedair elfen ddatblygol hyn o waith Tir Canol yn ffurfio’r prosiect ‘Cynnal’. Rydym yn gyffrous iawn i barhau i weithio gydag RSPB Cymru, Coed Cadw a chyda’n partneriaeth gynyddol i ddechrau cyflawni’r prosiectau hyn, gyda chefnogaeth cyllid hael gan Sefydliad Esmée Fairbairn. Gobeithiwn y bydd y cyllid hwn yn gam cadarn ymlaen i Tir Canol wrth i ni symud o’n cam datblygu craidd tuag at gyflawni’r holl syniadau sydd wedi’u bwydo i mewn i Glasbrint y prosiect dros y cyfnod Cydgynllunio craidd.
I helpu i gefnogi’r gwaith o gyflawni’r prosiectau cyffrous hyn, mae dwy swydd wag ar gael ar hyn o bryd hefo Tir Canol: ar gyfer Swyddog Gweinyddol a Swyddog Ymgysylltu. Bydd y ddau yn rhan-amser (dau ddiwrnod / 15 awr yr wythnos) ac yn cynnwys amrywiaeth eang o weithgareddau – ewch draw i’n tudalen ‘Cymerwch ran’ i gael rhagor o wybodaeth neu cliciwch ar y lluniau isod am ragor o wybodaeth.
Ychydig am ein cyllidwyr newydd.
Nod Sefydliad Esmée Fairbairn yw gwella ein byd naturio, sicrhau dyfodol tecach a chryfhau’r cysylltiadau mewn cymunedau yn y DU. Yn unol â glasbrint Tir Canol, mae Esmée yn datgloi newid trwy gyfrannu popeth o fewn ein gallu ochr yn ochr â phobl a sefydliadau sydd â syniadau gwych sy’n rhannu ein nodau.
